Faoiseamh cánach d’fhostaithe fiontar beag agus meánmhéide.

Cabhraíonn an Clár Rannpháirtíochta Príomhfhostaithe (CRPF) le micrifhiontair, le fiontair bheaga agus le fiontair mheánmhéide príomhfhostaithe a mhealladh trí chur ar chumas an fhiontair scair-roghanna a thairiscint d’fhostaithe le caitheamh fabhrach cánach. Tá formhór na ngníomhaíochtaí trádála incháilithe don scéim ach tá seirbhísí gairmiúla agus gníomhaíochtaí airgeadais áirithe eisiata.

D’fhéadfá a bheith incháilithe má:

• Is micrifhiontar, fiontar beag nó fiontar meánmhéide neamhluaite é do chuideachta
• Tá trádáil cháilitheach á déanamh agat

Tá an scéim ar fáil freisin do chuideachtaí a bhaineann le struchtúir ghrúpa níos mó, ar choinníoll go bhfuil siad mar chuid de ghrúpa cáilitheach. Tá incháilitheacht faoi réir téarmaí agus coinníollacha atá le fáil ar shuíomh gréasáin na gCoimisinéirí Ioncaim: https://www.revenue.ie/en/additional-incomes/employment-related-shares/key-employee-engagement-programme-keep/index.aspx#:~:text=KEEP%20is%20available%20for%20qualifying%20share%20options%20granted%20between%2001

Is féidir le do chuideachta roghanna a dheonú d’fhostaithe scaireanna a cheannach ag dáta sa todhchaí ar phraghas seasta. Bíonn díolúine ag na fostaithe maidir le cáin ioncaim, MSU agus ÁSPC ar aon ghnóthachan a réadaítear mar gheall ar an difríocht idir an praghas seasta agus an luach margaidh nuair a cheannaíonn an fostaí na scaireanna. Bíonn díolúine agatsa freisin maidir le ÁSPC fostóra ar scaireanna arna mbronnadh faoin scéim ar choinníoll go mbíonn na scaireanna sin i gcuideachta an fhostóra nó i gcuideachta a rialaíonn cuideachta an fhostóra.

Is féidir na scair-roghanna buntáiste cánach seo a dheonú d’fhostaithe lánaimseartha agus páirtaimseartha (20 uair ar a laghad) chun príomhbhaill foirne a mhealladh, a chúiteamh agus a choinneáil. Is féidir an scéim a úsáid chun tarraingteacht do thairisceana fostaíochta a fheabhsú.